CNRP ត្រូវចំណាយពេលច្រើនដើម្បីរម្ងាប់អារម្មណ៍សមាជិក
ភ្នំពេញ៖ ក្រោយពេលចាប់ខ្លួនបេក្ខជនតំណាងរាស្ត្រភ្លាម គណបក្សសង្គ្រោះជាតិស្ថិតក្នុងស្ថានភាពវឹកវរ។ តែក្រោយពេលចរចារួចហើយ គណបក្សដែលទើបមានប្រជាប្រិយភាពមួយនេះក៏រឹតតែប្រឈមនឹងស្ថាន ភាពលំបាកបន្ថែមទៀត ឬអាចថា វឹកវរបន្ថែមទៀត។ ការលំបាកចុងក្រោយរបស់គណបក្សសង្គ្រោះជាតិ គឺការពន្យល់ និងរម្ងាប់អារម្មណ៍អ្នកគាំទ្ររបស់ខ្លួនអោយជឿថា លទ្ធផលចរចារបស់ខ្លួនពិតជាមានប្រៀបលើគណបក្សប្រជាជនកម្ពុជាមែន។
ក្រោយថ្ងៃប្រកាសលទ្ធផលបោះឆ្នោតឆ្នាំ២០១៣កន្លងមក គណបក្សប្រជាជនកម្ពុជាដែលធ្លាប់ឈ្នះភ្លូកទឹកភ្លូកដី បានបង្ហាញអារម្មណ៍ស្រឡាំងកាំងដោយឃើញលទ្ធផលបោះឆ្នោតឆ្នាំ២០១៣ធ្លាក់ មកនៅត្រឹមតែ៦៨អាសនៈ ទល់នឹង៥៥អាសនៈសម្រាប់គណបក្សសង្គ្រោះជាតិដែលដឹកនាំដោយមេបក្សមាន ប្រជាប្រិយភាពពីរនាក់ គឺលោក សម រង្ស៊ី និងលោកកឹម សុខា។
គណបក្សប្រជាជនកម្ពុជា កាលណោះ ស្ថិតក្នុងសភាពវឹកវរផ្នែកអារម្មណ៍ និងសម្រេចចិត្តស្ថិតនៅស្ងាត់ស្ងៀមប្រឈមនឹងស្ថានការណ៍វឹកវរថ្មី។ ជារឿយៗ ថ្នាក់ដឹកនាំគណបក្សប្រជាជនកម្ពុជាប្រកាសជាញឹកញាប់បើកច្រកចរចា ជាមួយគណបក្សសង្គ្រោះជាតិ។ តែគណបក្សចុងក្រោយមួយនេះ មិនសូវជាចាប់អារម្មណ៍ប៉ុន្មានឡើយពីការចរចា ដោយពួកគេរវល់តែធ្វើចលនាមហាជនទៅវិញ។
ប៉ុន្តែ មុន និងក្រោយកិច្ចព្រមព្រៀងថ្ងៃទី២២ខែកក្កដាឆ្នាំ២០១៤កន្លងមកនេះ គណបក្សប្រជាជនកម្ពុជាហាក់បីដូចជាធូរទ្រូងបន្តិចហើយ។ គណបក្សប្រជាជនធូរស្រាលបន្តិច តែវាដល់វេនដែលគណបក្សសង្គ្រោះជាតិត្រូវប្រឈមនឹងស្ថានភាពលំបាក ទៅវិញ។ ការលំបាករបស់គណបក្សប្រឆាំងសង្គ្រោះជាតិនៅពេលនេះមើលទៅហាក់បីដូចជា ធ្ងន់ធ្ងរជាងគណបក្សប្រជាជនកម្ពុជាកាលពីក្រោយបោះឆ្នោតបន្តិចទៅទៀត ពីព្រោះ ការលំបាករបស់សង្គ្រោះជាតិចុងក្រោយនេះ គឺការពន្យល់ទៅកាន់សមាជិករបស់ខ្លួនអោយយល់ថា លទ្ធផលនៃការចរចារបស់ខ្លួនពិតជាមានប្រៀបលើគណបក្សប្រជាជនមែន។ សម្រាប់មេដឹកនាំគណបក្សសង្គ្រោះជាតិ លទ្ធផលនៃការចរចាថ្ងៃទី២២កក្កដាកន្លងមក គឺធ្វើអោយគណបក្សសង្គ្រោះជាតិចំណេញច្រើន ពីព្រោះ គណបក្សសង្គ្រោះជាតិអាចកែទម្រង់ គ ជ ប បាន និងអាចកែទម្រង់ស្ថាប័នមួយចំនួនផ្សេងទៀតផង។
ប៉ុន្តែសម្រាប់សមាជិកគាំទ្រគណបក្សសង្គ្រោះជាតិវិញ ពួកគេបានចោទប្រកាន់មេដឹកនាំគណបក្សសង្គ្រោះជាតិថា មិនបានគោរពពាក្យសន្យា ចរចាក្រោមគំនាប ខ្លាចគណបក្សប្រជាជនកម្ពុជា។ល។ អ្នកគាំទ្រខ្លះ ថែមទាំងនិយាយថា៖«ពួកគេអស់ជំនឿលើគណបក្សសង្គ្រោះជាតិជាដើម»។ អារម្មណ៍ច្របូកច្របល់ ខឹង មិនសប្បាយចិត្ត ដែលចេញពីអ្នកគាំទ្របានធ្វើអោយថ្នាក់ដឹកនាំគណបក្សសង្គ្រោះជាតិពិបាក ពន្យល់។ ហើយកិច្ចការនេះ គឺជាការប្រឈមរបស់គណបក្សសង្គ្រោះជាតិនាពេលអនាគត៕
ពត៌មានទាំងនេះបានពី ThmeyThmey.com 