អាផាតមិនជាង ៥២ភាគរយនៅកម្ពុជាគ្មានការចាត់ថ្នាក់
ភ្នំពេញ៖ នៅក្នុងប្រទេសកម្ពុជាអាគារអាផាតមិនទាំងអស់សរុបជាង ៣៧៤ ហើយអាគារអាផាតមិនគ្មានការចាត់ថ្នាក់មានចំនួនដល់ទៅ ១៩៤ ស្មើរនឹង ៥២ ភាគរយ ខណៈពេលដែលអាផាតមិនមានការចាត់ថ្នាក់មានចំនួនតែ ៤៨ ភាគរយ ប៉ុណ្ណោះ។ នេះបើតាមសម្តីរបស់លោក គុយ វ៉ាត នៅក្នុងពិធីដាក់ផ្សាយរបាយការណ៍អាផាតមិន ២០១៤ នៅក្នុងរាជធានីភ្នំពេញ នៅថ្ងៃទី២៨ ខែកក្កដា ឆ្នាំ២០១៤ ។
បើតាមរបាយការណ៍ សេវាកម្មអាផាតមិនដែលគ្មានការចាត់ថ្នាក់ គឺសំដៅលើអាផាតមិនដាក់ជួល មានចាប់ពី ៥ ទៅ ១០០ បន្ទប់ដែលស្ថិតនៅក្រោមស្តង់ដារសេវាកម្មអាផាតមិន ។ អាផាតមិនទាំងនោះ មានលក្ខណៈជាគ្រួសារ និងដំណើការជាអាជីវកម្មបែបគ្រូសារ ដោយគ្មានការធ្វើទីផ្សារ និងការគ្រប់គ្រងត្រឹមត្រូវ ។ ភ្ញៀវភាគច្រើនស្នាក់នៅក្នុងអាផាតមិនប្រភេទនេះ ភាគច្រើន ជាជនបរទេសដែលមានចំនូលទាប និងភ្ញៀវស្នាក់នៅក្នុងស្រុកមួយចំនួនតូច ។
លោក គុយ វ៉ាត អគ្គនាយកនៃក្រុមហ៊ុន វីត្រាស គ្រុប បាននិយាយប្រាប់គេហទំព័រថ្មីៗថាអាគារអាផាតមិនដែលមានលក្ខណៈគ្រួសារ និងក្រុមហ៊ុនអភិវឌ្ឍន៍អចលនទ្រព្យភាគច្រើន ប្រមាណជាង ៩២ ភាគរយត្រូវបានម្ចាស់អចលនទ្រព្យគ្រប់គ្រងដោយខ្លួនឯងផ្ទាល់ ។ ហើយមានតែអាគារអាផាតមិន ៨ ភាគរយប៉ុណ្ណោះ ដែលគ្រប់គ្រងដោយក្រុមហ៊ុនគ្រប់គ្រងអចលនទ្រព្យ ។
លោកបានបញ្ជាក់ថា៖«អាផាតមិនដែលមានម្ចាស់គ្រប់គ្រងផ្ទាល់ គឺដោយសារខ្វះហិរញ្ញវត្ថុសម្រាប់ជួលក្រុមហ៊ុនគ្របគ្រងអចលនវត្ថុ ប៉ុន្តែនាពេលសហមាហរកម្មតំបន់ ពួកគេនឹងងាកមករកសេវាកម្មនេះ ដើម្បីជួយស្វែងរកអតិថិជន គ្រប់គ្រងសេវាគ្រប់គ្រង ផ្សព្វផ្សាយ និងមានលក្ខណៈស្តង់ដារ» ៕