ហេតុអ្វីបានជាលោក ហ៊ុន សែន សួរមេបក្សសង្គ្រោះជាតិអំពីចម្ការដំណាំមុនចរចា ?
ក្រោយពី បានចាប់ដៃស្វាគមន៍មេដឹកនាំនិងមន្ត្រីគណបក្សសង្គ្រោះជាតិ ទាំង៨រូបហើយ លោកនាយករដ្ឋមន្ត្រី ហ៊ុន សែន បានទៅអង្គុយលើតុចរចា ទល់មុខមេដឹកនាំបក្សសង្គ្រោះជាតិ។ ខណៈដែលអ្នកកាសែតរាប់សិបអ្នកកំពុងចុចម៉ាស៊ីនថតផ្តិតយករូបភាព ផ្តើមការចរចាទំនាស់នយោបាយ សំឡេងម៉ាស៊ីនថតដែលលាន់ឮដូចគេបាញ់កាំភ្លើងរះ មិនបានលុបលើសំឡេងលោកហ៊ុន សែន ដែលសួរនាំលោក សម រង្ស៊ី និងលោក កឹម សុខា អំពីចំការល្ហុង ម្រេច ចេក របស់អ្នកនយោបាយបក្សប្រឆាំងនោះឡើយ។ តើសំណួរសាមញរបស់បុរសខ្លាំង ហ៊ុន សែន អាចមានន័យអ្វីខ្លះ?
អាចមានការបកស្រាយផ្សេងៗគ្នាទៅលើសំណួរដ៏សាមញ្ញរបស់លោកនាយក រដ្ឋមន្ត្រី ហ៊ុន សែន ដែល សួរសុខទុក្ខមេដឹកនាំគណបក្សប្រឆាំងអំពីចំការបន្លែផ្លែឈើរបស់ពួកគេ។ អ្នកខ្លះថា នេះជាការសួរសុខទុក្ខធម្មតា ដែលជាការផ្តើមពាក្យនិយាយគ្នាមុនចូលសាច់រឿងនៃការចរចា។ អ្នកជំនាញវិទ្យាសាស្ត្រនយោបាយ លោក គង់ ភោគ ដែលជាអ្នកតាមដានស្ថានការណ៍នយោបាយនៅកម្ពុជាមួយរូបដែរនោះ ក៏បានយល់ឃើញថា សំណួររបស់លោកហ៊ុន សែន អាចជាសំណួរគួរសមធម្មតាដែរ។ ប៉ុន្តែសម្រាប់លោក គង់ ភោគ សំណួរសាមញ្ញនេះក៏អាចត្រូវបានគេបកស្រាយឆ្ងាយពីភាពធម្មតាដែរ។
អ្នកវិភាគនយោបាយដដែលយល់ឃើញថា លើសពីការគិតបែបសាមញ្ញ មនុស្សមួយចំនួនក៏អាចចាត់ទុកសំណួររបស់លោក ហ៊ុន សែន ជាសារមួយ ដែលលោកចង់ប្រាប់ថា សកម្មភាពរបស់មេគណបក្សទាំងពីរមិនអាចនៅឆ្ងាយពីក្រសែភ្នែករបស់លោក ហ៊ុន សែន ឡើយ។ «វាក៏ជាសារមួយប្រាប់ទៅគណបក្សសង្គ្រោះជាតិថា ដំណោះស្រាយនៃ ភាពជាប់គាំងនយោបាយនេះ មិនត្រឹមតែមានឥទ្ធិពលជាវិជ្ជមានទៅលើសកម្មភាពសេដ្ឋកិច្ចជាតិ ប៉ុណ្ណោះទេ។ ប៉ុន្តែវាក៏ជាការល្អ សម្រាប់គណបក្ស ប្រឆាំងផងដែរ តួយ៉ាងដូចជា ជំនួញផ្ទាល់ខ្លួនរបស់មេគណបក្សសង្គ្រោះជាតិទាំងពីរ»។ នេះជាការអត្ថាធិប្បាយរបស់លោក គង់ ភោគ។
ប្រសិនបើគេនៅតែឆ្ងល់អំពីសំណួរដ៏សាមញ្ញរបស់លោកនាយករដ្ឋមន្ត្រី អ្នកជំនាញវិទ្យាសាស្ត្រនយោបាយគង់ ភោគ អាចរំលឹកឡើងវិញអំពីអត្តចរិត ឬបុគ្គលិកលក្ខណៈរបស់លោកនាយករដ្ឋមន្ត្រី ដែលចូលចិត្តបង្ហាញអំពីភាពសាមញ្ញជាទូទៅទៅកាន់សាធារណៈជន និងដៃគូ។
ខាងលើគ្រាន់តែជាការវិភាគផ្សេងៗគ្នាប៉ុណ្ណោះ ប្រសិនបើគេចាប់អារម្មណ៍ទៅលើសំណួររបស់លោកហ៊ុន សែន។ ប៉ុន្តែថាតើវាគ្រាន់តែសំណួរគួរសមធម្មតា ឬក៏ជាសំណួរដែលមានបង្កប់អត្ថន័យនយោបាយមែននោះ? គឺមានតែលោកនាយករដ្ឋមន្ត្រី ហ៊ុន សែន ដែលធ្លាប់ប្រកាសថា មានពិសោធន៍ក្នុងសមរភូមិចរចាប៉ុណ្ណោះ ដែលអាចប្រាប់ចំលើយបាន៕
ពត៌មានទាំងនេះបានពី ThmeyThmey.com 