លោក ហ៊ុន សែន ថាតួនាទីលោកស្រី ពុង ឈីវកេក នឹងពង្រឹងអព្យាក្រឹតភាព គ.ជ.ប
លោក ហ៊ុន សែន ក្នុងនាមជាអនុប្រធានគណបក្សប្រជាជនកម្ពុជា បានសម្តែងការស្វាគមន៍ចំពោះបេក្ខភាពរបស់លោកស្រី ពុង ឈីវកេក ក្នុងតួនាទីជាសមាជិកទី៩នៃគណៈកម្មាធិការរៀបចំការបោះឆ្នោត នាពេលខាងមុខ។ នេះបើយោងតាមលិខិតឆ្លើយឆ្លងគ្នាមួយរវាងលោក និងប្រធានអង្គការលីកាដូ នៅថ្ងៃទី២៨ ខែកក្កដា ឆ្នាំ២០១៤ ។
លោក ហ៊ុន សែន បានសរសេរទៅកាន់លោកស្រី ពុង ឈីវកេកថា៖ «ផ្អែកលើបទពិសោធន៍ការងារ និងមនសិការស្នេហាជាតិរបស់លោកស្រី គណបក្សប្រជាជនកម្ពុជាសង្ឃឹមយ៉ាងមុតមាំថា ការសម្រេចចិត្តក្នុងការទទួលយកតួនាទីដ៏មានសារសំខាន់ខាងលើនេះ បានរួមចំណែកដល់ភាពរលូន និងប្រសិទ្ធភាពនៃការអនុវត្តកិច្ចព្រមព្រៀងស្តីពីដំណោះស្រាយនយោបាយ រវាងគណបក្សប្រជាជនកម្ពុជា និងគណបក្សសង្គ្រោះជាតិកាលពីថ្ងៃទី២២ ខែកក្កដា ឆ្នាំ២០១៤ »។
លោកនាយករដ្ឋមន្ត្រី បានលើកឡើងថា តួនាទីឯករាជ្យរបស់លោកស្រី ពុង ឈីវកេក ពិតជានឹងរួមវិភាគទានដល់អព្យាក្រឹតភាពនៃស្ថាប័នរៀបចំការបោះឆ្នោត ដើម្បីសម្រេចបេសកកម្មរបស់ខ្លួនស្របតាមរដ្ឋធម្មនុញ្ញ និងច្បាប់ជាធរមាន។
យោងតាមការផ្សាយរបស់គេហទំព័រ Asia Times Online លោកស្រី ពុង ឈីវកេក បានជួបលោក ហ៊ុន សែន ជាលើកដំបូងនៅក្នុងឆ្នាំ១៩៨៣ ក្នុងប្រទេសអង់ហ្គោឡា ខណៈដែលស្វាមីលោកស្រីបម្រើការងារជាឯកអគ្គរដ្ឋទូតបារាំងប្រចាំនៅ ទីនោះ។ បើយោងតាមសៀវភៅ «When the War was Over» របស់អ្នកកាសែតឈ្មោះ Elizabeth Becker នាជំនួបនោះ លោកស្រី ឈីវកេក បានអញ្ចើញលោក ហ៊ុន សែន (កាលណោះជារដ្ឋមន្ត្រីក្រសួងការបរទេស) ទៅផ្ទះរបស់លោកស្រី។
ប្រហែលជាចាប់ផ្តើមពីជំនួបជាមួយលោក ហ៊ុន សែន លើកដំបូងនោះហើយ ដែលបណ្តុះគំនិតឲ្យលោកស្រី ឈីវកេក រៀបចំឲ្យមានការចរចាដើម្បីសន្តិភាពនៅកម្ពុជា។ គំនិតនេះត្រូវបានគេលើកឡើងថា មានការជួយជ្រោមជ្រែងយ៉ាងពេញទំហឹងពីឪពុកម្តាយរបស់លោកស្រី ដោយសារតែពួកគាត់សុទ្ធតែជាមន្ត្រីដ៏ជំនិតរបស់អង្គសម្តេចឪ។
សូមបញ្ជាក់ថានៅថ្ងៃចន្ទដដែលនេះ លោកស្រីប្រធានអង្គការលីកាដូ ក៏បានឆ្លើយឆ្លងលិខិតជាមួយលោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិផងដែរ។ ដូចជាលោក ហ៊ុន សែន ផងដែរ មេដឹកនាំបក្សប្រឆាំងសុទ្ធតែបង្ហាញនូវការគាំទ្រពេញទំហឹងចំពោះសមាសភាព របស់សកម្មជនសិទ្ធមនុស្សវ័យ៧១ឆ្នាំរូបនេះ។
លោក សម រង្ស៊ី និងលោក កឹម សុខា បានវាយតម្លៃថា លោកស្រី ពុង ឈីវកេក នឹងជំរុញ និងធានាឲ្យ គ.ជ.ប ជាស្ថាប័នឯករាជ្យ ដែលមានស្វ័យភាពក្នុងការធ្វើការសម្រេចចិត្ត និងសកម្មភាពផ្សេងៗ ដើម្បីធានាឲ្យការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តិធម៌។
មុននេះបន្តិច ពោលគឺមុនទទួលបានការឆ្លើយតបពីគណបក្សប្រជាជនកម្ពុជា លោកស្រី ពុង ឈីវកេក បានបញ្ជាក់ប្រាប់គេហទំព័រថ្មីៗថា លោកស្រីបានដាក់លក្ខខណ្ឌមួយចំនួនជាថ្នូរនឹងការយល់ព្រមចូល ធ្វើជាបេក្ខភាពទី៩ក្នុងគណៈកម្មាធិការជាតិរៀបចំការបោះឆ្នោត ថ្មីនេះ។
« លក្ខខណ្ឌរបស់ខ្ញុំ គឺគ្មានអ្វីក្រៅតែពីការធានាអោយ គជប នេះ ដំណើរការដោយឯករាជ្យឡើយ»។ នេះជាការអត្ថាធិប្បាយរបស់ លោកស្រី វេជ្ជបណ្ឌិត ពុង ឈីវកេក ដែលមេដឹកនាំគណបក្សជាប់ឆ្នោតទាំងពីរបានស្នើដូចគ្នា អោយលោកស្រីធ្វើជាបេក្ខភាពទី៩ នៃគជប ថ្មី។
ក្រោយពីបានទទួលការស្នើសុំពីគណបក្សនយោបាយទាំងពីរ លោកស្រីបញ្ជាក់ថា លោកបានទទួលយកការស្នើនេះ ប៉ុន្តែលោកបានសរសេរឆ្លើយតបទៅគណបក្សទាំងពីរវិញ ជាមួយលក្ខខណ្ឌមួយចំនួន។
លោកស្រី ពុង ឈីវកេក បញ្ជាក់ថា៖«ខ្ញុំបានសរសេរដាក់ថា លក្ខខណ្ឌទី១ ទី២ ទី៣ អ៊ីចឹងទេ។ វាជាការរៀបរាប់របស់ខ្ញុំ។ ខ្ញុំមិនទាន់អាចបញ្ជាក់បាននៅឡើយ។ ខ្ញុំចាំមើលគណបក្សប្រជាជនកម្ពុជាឆ្លើយសិន»។ ប៉ុន្តែបើយោងតាម លិខិតរបស់លោកស្រីដែលសរសេរទៅកាន់ លោក សម រង្ស៊ី និងលោក កឹម សុខា នោះ លោកស្រី ពុង ឈីវកេក បានស្នើអោយ «សមាជិក គជប ទទួលបានការការពារអភ័យឯកសិទ្ធិ ការធានាស្វ័យភាពក្នុងធ្វើសេចក្តីសម្រេចចិត្ត មានសិទ្ធិរើសមន្ត្រីជំនាញ ផ្នែកគ្រប់គ្រង ចាត់ចែង ការទទួលបានថវិកាដោយឯករាជ្យ និងជំនួយផ្សេងៗពីក្រៅប្រទេស»៕
ពត៌មានទាំងនេះបានពី ThmeyThmey.com 