ប្រធានាធិបតីឥណ្ឌូនេស៊ីថ្មី កំពុងប្រឈមនឹងបញ្ហាកំណែទម្រង់ស៊ីជម្រៅក្នុងប្រទេស
ក្រោយពី បានជាប់ឆ្នោតជាប្រធានាធិបតីថ្មីនៃរដ្ឋប្រជាធិបតេយ្យដ៏ធំទីបីនៃ សកលលោក លោក JokoWidodo កំពុងប្រឈមមុខនឹងបញ្ហាជាច្រើនជាពិសេសគឺការធ្វើកំណែទម្រង់មួយ ស៊ីជម្រៅនៅក្នុង ប្រព័ន្ធគ្រប់គ្រងប្រទេសឥណ្ឌូនេស៊ី។ ការបោសសម្អាតអំពើពុករលួយមានលក្ខណៈជាប្រព័ន្ធ នៅក្នុងប្រទេសឥណ្ឌូនេស៊ី អាចនឹងក្លាយជាគោលដៅដំបូងបង្អស់ ដែលប្រធានាធិបតីថ្មីរូបនេះត្រូវចាប់ផ្តើមក្រោយឡើងកាន់តំណែង។
ប្រទេសឥណ្ឌូនេស៊ីត្រូវបានគេចាត់ទុកជារដ្ឋប្រជាធិបតេយ្យទី៣ និងជារដ្ឋដែលមានប្រជាជនច្រើនជាង គេទី៤លើសកលលោក តែយ៉ាងណា ប្រទេសនេះកំពុងត្រូវការកំណែទម្រង់មួយស៊ីជម្រៅដើម្បីជម្រុញ អោយដំណើរការប្រជាធិបតេយ្យនៅក្នុងប្រទេសកាន់តែល្អប្រសើរឡើង។
ក្រោយពីត្រូវបានប្រកាសថាបានឈ្នះឆ្នោតជាប្រធានាធិបតីឥណ្ឌូនេស៊ីថ្មី លោក JokoWidodo ត្រូវបាន គេមើលឃើញថា លោកកំពុងប្រឈមជាមួយបញ្ហាជាច្រើនដែលត្រូវដោះ ស្រាយ តួរយ៉ាងដូចជាការធ្វើ កំណែទម្រង់ស្ថាប័នដឹកនាំ និងការបោសម្អាតអំពើពុករលួយដែលមានលក្ខណៈជាប្រព័ន្ធនៅក្នុង ប្រទេសផងដែរ។ តាមពិត អំពើពុករលួយ និងបញ្ហាកើតមានក្នុងស្ថាប័នដឹកនាំឥណ្ឌូនេស៊ី សុទ្ធសឹង តែជាមរតកបន្សល់ទុកតាំងពីរបបដឹកនាំរបស់មេដឹកនាំផ្តាច់ការ ស៊ូហាតូ ដួលរលំឆ្នាំ១៩៩៨ មកម្លេះ។
លោក Widodo គឺជាមេដឹកនាំឥណ្ឌូនេស៊ីដំបូងបង្អស់ដែលឡើងកាន់តំណែង ដោយមិនមានសែ ស្រឡាយក្នុងវណ្ណៈដឹកនាំអភិជន ឬមានជាប់ពាក់ព័ន្ធជាមួយរបបដឹកនាំចាស់ឡើយ ប៉ុន្តែលោកជាអ្នក នយោបាយម្នាក់ដែលឡើងកាន់តំណែងជាមេដឹកនាំកំពូលឥណ្ឌូនេស៊ីតាមរយៈ ការខិតខំប្រឹងប្រែង និងសមត្ថភាពផ្ទាល់ខ្លួនក្នុងការបង្កើតគោលនយោបាយដ៏ល្អសម្រាប់ដឹកនាំ រដ្ឋ។
ទោះជាយ៉ាងណាក៏ដោយ ក្រោយពេលជាប់ជាប្រធានាធិបតីថ្មីនៃប្រទេសឥណ្ឌូនេស៊ី លោក Widodo ត្រូវប្រឈមមុខជាមួយបញ្ហាយ៉ាងច្រើនសម្បើម ជាពិសេសបញ្ហាសេវាសា ធារណៈ ដែលកំពុងញាំញី ដោយអំពើពុករលួយដែលមានលក្ខណៈជាប្រព័ន្ធ និងបញ្ហាការិយាធិបតេយ្យតែម្តង។ ប្រជាជនឥណ្ឌូ ស្ទើរតែពាក់កណ្តាលប្រទេស កំពុងរស់នៅក្នុងភាពក្រីក្រ ហើយបញ្ហាសេដ្ឋកិច្ចឯនោះ វិញកំពុងស្ថិត នៅក្នុងភាពទន់ខ្សោយ និងផុយស្រួយនៅឡើយ។
លោក Widodoបានសន្យាថា លោក នឹងចាប់ផ្តើមកាត់បន្ថយបន្តិចម្តងៗនូវគម្រោងផ្តល់ជំនួយឧបត្ថម្ភ របស់រដ្ឋាភិបាលទៅកាន់ប្រជាជនលើបញ្ហាថាមពលនៅក្នុងប្រទេសផងដែរ បើទោបីថវិកាឧបត្ថម្ភនេះ ស្មើនិង ២០ភាគរយនៃថវិកាជាតិក៏ដោយ។ តែយ៉ាងណាមានការប្រឆាំងរួចរាល់ទៅហើយ ព្រោះ គម្រោងឧបត្ថម្ភថវិកានេះ ជាបញ្ហារសើបផ្នែកនយោបាយ ដែលមានមនុស្សជាច្រើនធ្លាប់ទទួលបាន ប្រយោជន៍ពីគម្រោងនេះ ។
គេមិនដឹងថា ប្រធានាធិបតីថ្មីខាងលើនឹងអាចអនុវត្តគោលនយោបាយកំណែទម្រង់របស់លោកបាន ឬយ៉ាងណាណោះឡើយ ព្រោះអាសនៈភាគច្រើននៅក្នុងសភា ត្រូវបានកាន់កាប់ដោយគណបក្ស របស់ដៃគូប្រជែងរបស់លោក គឺលោក Prabowo។ ដូច្នេះហើយទើបនៅក្នុងសភាឥណ្ឌូនេស៊ី មានការ ប្រឈមមុខដាក់គ្នាខ្លាំង។
ក្រៅពីបញ្ហាប្រឈមក្នុងការធ្វើកំណែទម្រង់លើថវិកាឧបត្ថម្ភ ក្នុងវិស័យថាមពល ក៏ដូចជាលុបបំបាត់ បញ្ហាពុករលួយ ប្រធានាធិបតីថ្មី Widodo ក៏ត្រូវប្រឹងប្រែងដោះស្រាយបញ្ហាកើតមានក្នុងវិស័យ សុខា ភិបាល និងវិស័យអប់រំផងដែរ។ អតីតចៅហ្វាយក្រុង ហ្សាកាតារូបនេះ ប្រហែលជាយកកម្មវិធីគោល នយោបាយសុខាភិបាល និងអប់រំដែលលោកអនុវត្តបានជោគជ័យនៅក្នុងក្រុងហ្សាកាតា ទៅអនុវត្ត នៅថ្នាក់ជាតិផងដែរ។
គួរបញ្ជាក់ថា ប្រធានាធិបតីឥណ្ឌូនេស៊ី លោក SusiloBambangYudhoyono (ស៊ូស៊ីឡូបាំបាំង យុតហូយូណូ)ក៏ធ្លាប់សន្យាថាលោកនឹងបោសសម្អាតបញ្ហាពុករលួយអោយអស់ ក្នុងអាណត្តិរបស់លោកជាប្រធានាធិបតីផងដែរ តែយ៉ាងណាបញ្ហាមួយនេះនៅតែជាបញ្ហាគួរអោយព្រួយបារម្ភនៅក្នុងសង្គម ឥណ្ឌូនេស៊ីនៅឡើយ។ គេសង្ឃឹមថា ប្រធានាធិបតីថ្មីដែលចេញមកពីត្រកូលគ្រួសារក្រីក្រ មកពី គណបក្សប្រឆាំងរូបនេះ នឹងអាចដោះស្រាយបញ្ហាប្រឈមមួយនេះបានជោគជ័យនៅពេលលោក ឡើងកាន់តំណែងក្នុងពេលឆាប់ៗខាងមុខនេះ៕
ប្រែសម្រួលដោយ សៅ ផលនិស្ស័យ
ពត៌មានទាំងនេះបានពី ThmeyThmey.com 